Esboniad o’r Rhwydwaith Gwledig a Rennir
Mae'r Rhwydwaith Gwledig a Rennir (SRN) yn fenter gydweithredol rhwng Llywodraeth y DU, gweithredwyr rhwydwaith symudol ac awdurdodau lleol, gyda'r nod o ymestyn signal ffonau symudol i ardaloedd gwledig. Mae'r prosiect uchelgeisiol hwn wedi'i gynllunio i sicrhau bod gan hyd yn oed y cymunedau mwyaf anghysbell fynediad at wasanaethau ffonau symudol a band eang dibynadwy, gan bontio'r rhaniad digidol a meithrin twf economaidd.
Mae'r Rhwydwaith Gwledig a Rennir wedi bod yn gwneud camau sylweddol i wella cysylltedd digidol, sy'n cael effaith gadarnhaol ar gymunedau gwledig ar draws rhanbarth Bargen Ddinesig Bae Abertawe.
Mae defnyddio seilwaith 4G uwch a seilwaith sy'n barod ar gyfer 5G yn sicrhau bod ardaloedd gwledig yn derbyn yr un signal ffonau symudol o ansawdd uchel â chanolfannau trefol, gan gefnogi busnesau lleol, gwella gwasanaethau cyhoeddus, a darparu gwell mynediad i adnoddau digidol i breswylwyr.
Mae'r dull cydweithredol hwn nid yn unig yn sicrhau bod budd pennaf pawb yn cael ei gynrychioli, ond mae hefyd yn creu llwyfan haws i weithredu seilwaith a rennir sy'n lleihau'r effaith ar yr amgylchedd gan fod angen llai o fastiau.
Dywedodd Julian Shariff, Pennaeth Eiddo ac Ystadau yn Cornerstone:
Mae partneru â gweithredwyr rhwydwaith symudol ac awdurdodau cynllunio lleol yn ein galluogi i gymryd dull sydd wedi’i deilwra'n arbennig ar gyfer anghenion unigryw pob rhanbarth. Trwy gael dealltwriaeth fanwl o'r dirwedd a gofynion penodol y gymuned, rydym yn sicrhau bod ein datrysiadau seilwaith nid yn unig yn ymatebol ond hefyd yn parchu'r amgylchedd lleol. Mae’r dull cymuned yn gyntaf hwn yn ein galluogi i ddarparu cysylltedd sydd wir yn gwasanaethu ac yn cefnogi’r bobl sy’n byw ac yn gweithio yn yr ardaloedd hyn, gan feithrin buddion hirdymor i bawb dan sylw.Julian Shariff, Pennaeth Eiddo ac Ystadau yn Cornerstone
Mae'n ofynnol i'r broses gynllunio drylwyr ar gyfer adeiladu mastiau newydd ddilyn canllawiau llym Llywodraeth Cymru sy'n sicrhau bod lleisiau pawb yn cael eu clywed. Trwy broses ymgynghori, gall aelodau'r cyhoedd ymateb i geisiadau a sicrhau bod eu barn yn rhan o'r broses gyffredinol o wneud penderfyniadau. Bydd hyn yn ei wneud yn ddull cytbwys sy'n ystyried yr holl ffactorau o ran adeiladu unrhyw fast newydd.
Dywedodd James Waring, Rheolwr Llywodraethu yn Vodafone UK:
Fel Rhwydwaith y Genedl, rydym wedi ymrwymo o hyd i sicrhau bod cymunedau a lleoliadau gwledig ledled y DU yn cael yr un lefelau o gysylltedd â'u cymheiriaid gwledig. Gwnaethom fabwysiadu'r rhaglen Rhwydwaith Gwledig a Rennir yn gynnar ac rydym yn parhau i weithio gyda'r Llywodraeth a sefydliadau lleol fel Cyngor Sir Caerfyrddin i ddarparu'r rhaglen, gan sicrhau bod ein cwsmeriaid sy'n byw, yn gweithio ac yn ymweld â'n cefn gwlad hardd yn cael y signal y maent yn dibynnu arno ac yn ei haeddu.James Waring, Rheolwr Llywodraethu yn Vodafone UK
Dywedodd y Cynghorydd Hazel Evans, Cyngor Sir Caerfyrddin:
Mae'r Rhwydwaith Gwledig a Rennir yn dyst i'r hyn y gellir ei gyflawni drwy gydweithio. Mae'n helpu i adeiladu rhanbarth mwy cysylltiedig, gan sicrhau y gall pawb elwa ar gael gwell cysylltedd digidol, gan ystyried yn ofalus ffyrdd o leihau effaith adeiladu mastiau newydd ar yr amgylchedd. Bydd gwella'r seilwaith digidol mewn ardaloedd gwledig yn helpu i ddenu busnesau newydd a buddsoddiad i'r rhanbarth ac yn sicrhau nad yw'r cymunedau hynny'n cael eu gadael ar ôl. Yn ogystal, dealltwriaeth o anghenion pawb sy'n gysylltiedig â hyn sy'n gwneud y broses hon yn un gwbl gynhwysol.Cynghorydd Hazel Evans, Cyngor Sir Caerfyrddin
Ewch i wefan y Rhwydwaith Gwledig a Rennir i gael rhagor o wybodaeth amdano, a siaradwch â'ch Hyrwyddwr Digidol lleol i gael rhagor o wybodaeth am y modd mae'n effeithio ar eich ardal.