Mae pum mlynedd o fand eang ffeibr am ddim, a ddarperir gan Virgin Media O2 fel rhan o ymrwymiadau gwerth cymdeithasol y Rhaglen Seilwaith Digidol o dan Brosiect Ffeibr Tywyll yn y Dwyrain, yn helpu Cwmni Buddiant Cymunedol Ffydd Gobaith Cymru i ehangu ei gefnogaeth hanfodol i deuluoedd ledled Castell-nedd Port Talbot gan sicrhau nad yw tlodi digidol yn dod yn rhwystr arall i gael mynediad at wasanaethau a chymorth hanfodol.
Mae Ffydd Gobaith Cymru yn Gwmni Buddiant Cymunedol sy'n gweithio gyda theuluoedd sy'n wynebu heriau cymhleth gan gynnwys brwydrau iechyd meddwl, camddefnyddio sylweddau, tlodi a mwy. Trwy fentora, sgyrsiau, a mynediad at fanc dillad a bwyd, mae'r tîm yn darparu cymorth cofleidiol i'r rhai mewn sefyllfaoedd argyfyngus.
Gyda chysylltedd dibynadwy bellach ar waith, mae Ffydd Gobaith Cymru yn adeiladu haen ddigidol i'w wasanaethau fel y gall teuluoedd bregus gael mynediad i'r systemau ar-lein sy'n rheoli bywyd bob dydd fwyfwy. Dywedodd Margaret Williams, Cyfarwyddwr Ffydd Gobaith Cymru:
I'r teuluoedd rydyn ni'n gweithio gyda nhw, mae mynediad at fand eang dibynadwy yn llawer mwy na Wi-Fi, mae'n fynediad at fwyd, tai, iechyd a gobaith. Trwy gael band eang ffeibr yn y ganolfan, gallwn groesawu pobl i mewn, eistedd ochr yn ochr â nhw, a chwblhau'r tasgau ar-lein sy'n allwedd i newid go iawn - boed hynny'n atgyfeiriad meddyg teulu, cais am fudd-daliadau, neu lwybr yn ôl i'r gwaith.Margaret Williams, Ffydd Gobaith Cymru
Margaret Williams, Cyfarwyddwr, Cwmni Buddiant Cymunedol Ffydd Gobaith Cymru
Mae Ffydd Gobaith Cymru yn bwriadu cynyddu ei waith cynhwysiant digidol gan ddarparu dyfeisiau, cymorth data, a chanllawiau un-i-un i helpu pobl i lywio'r we yn ddiogel ar gyfer gwaith, dysgu, iechyd a budd-daliadau. Mae hyn yn golygu y gall mwy o deuluoedd gael mynediad at y cymorth sydd ei angen arnynt heb gael eu dal yn ôl gan ddiffyg cysylltedd neu hyder.
Bydd y sefydliad hefyd yn cofrestru gyda phrif elusen cynhwysiant digidol y DU, Good Things Foundation gan ddatgloi mynediad i'r Banc Data Cenedlaethol (SIM data symudol am ddim), y Banc Dyfeisiau Cenedlaethol (dyfeisiau wedi'u hadnewyddu), a'r platfform Learn My Way ar gyfer sgiliau digidol i ddechreuwyr. Bydd hyn yn caniatáu i'r tîm gynnig cefnogaeth ddigidol strwythuredig, ddiogel i'r rhai sydd fwyaf mewn angen.
I gael gwybod mwy am Fydd Gobaith Cymru ac i gysylltu’n uniongyrchol â nhw, ewch i’w gwefan.