Mae bod yn berson ifanc sy'n gadael gofal, wedi'i ddieithrio oddi wrth eich teulu neu mewn perygl o ddigartrefedd yn rhai o'r heriau anodd y mae llawer o bobl ifanc yn eu hwynebu.
Gall straen a phryder yr amgylchiadau bywyd hyn gael effaith drychinebus ar ddatblygiad a gobeithion person. Heb sylfaen sefydlog, mae llawer o bobl yn eu cael eu hunain heb addysg, gyda diffyg hunan-barch heb lawer o grwpiau o ffrindiau i gysylltu â nhw.
Mae The Sunflower Lounge yng Nghastell-nedd Port Talbot yn gweithio gyda llawer o bobl yn yr amgylchiadau hyn o 18 oed ymlaen, gan gynnig cymorth iddynt i addysg, addysg bellach a chyflogaeth. Dyma'r rhwydwaith cymorth cyntaf o'i fath yn yr ardal lle gall pobl ifanc ennill sgiliau gwerthfawr i'w paratoi'n well ar gyfer eu dyfodol.
Gan weithio i greu cyfleoedd cyflogaeth mewnol, maent yn dyfeisio prosiectau gyda gofal yn ganolog iddynt, gan wneud yn siŵr bod eraill yn y gymuned yn elwa. Mae'r tîm o wirfoddolwyr yn cynnig rolau prosiect i bobl ifanc i ddatblygu sgiliau allweddol ond maent wedi cael trafferth cyflawni eu hamcanion yn llawn oherwydd cysylltiad rhyngrwyd gwael.
Ni fyddai dim o hyn wedi bod yn bosibl gan ddefnyddio ein cysylltiad rhyngrwyd blaenorol gan y byddai'n aml yn ddiffygiol. Nawr, gallwn ni symud ymlaen â hyder a datblygu a chynorthwyo hyd yn oed mwy o bobl yng nghymuned Castell-nedd Port Talbot, gan eu helpu i adeiladu dyfodol gwell iddyn nhw eu hunain ac eraill.
Diolch i'r cynnig gwerth cymdeithasol gan Virgin Media O2 fel rhan o brosiect Ffeibr Tywyll yn y Dwyrain, mae The Sunflower Lounge bellach wedi cael band eang ffeibr am ddim am y pum mlynedd nesaf, sydd wedi caniatáu iddyn nhw ddatblygu eu gwaith i'r lefel nesaf.
Ers i'r ganolfan cael ei chysylltu, mae'r tîm cyfan wedi cael eu hyfforddi fel hyrwyddwyr digidol, fel y gallan nhw ddefnyddio eu sgiliau digidol nid yn unig i reoli eu prosiectau, ond i ryngweithio mwy â sectorau eraill o'r gymuned a fyddai'n elwa o gael mynediad i'r rhyngrwyd.
Dywedodd Helen Davies, Sylfaenydd The Sunflower Lounge:
Mae'r hyn rydyn ni'n ei wneud yma yn achubiaeth i'r rhai sydd wedi cael magwraeth heriol. Weithiau mae'n anodd deall sut beth yw bod mewn sefyllfa lle rydych chi'n cael eich gadael i wynebu'r byd heb sgiliau sylfaenol iawn. Mae'n sefyllfa frawychus ac yn un sy'n gallu cael effaith niweidiol ar ddyfodol person. Mae mynd ar-lein i gael mynediad at raglenni, offer a gwasanaethau wedi bod yn rhwystr enfawr i ni gan fod rhan fawr o'r hyn rydyn ni'n ei wneud yn ddigidol. Rydym hefyd yn symud i faes cymorth tai, fel y gallwn helpu'r rheiny sy'n ddigartref yn uniongyrchol. Mae cael y dulliau ar-lein mwyaf effeithiol o reoli hyn yn rhan annatod o'n llwyddiant. Bellach, gallwn ni gynnig cartrefi i bobl ifanc a hefyd darparu cyflogaeth sy'n bwydo'n ôl i'r sefydliad.Helen Davies, The Sunflower Lounge
Mae un o'r prosiectau hyn o'r enw 'Through the Ages' yn darparu profiadau te parti rhyngweithiol i'r henoed i'w helpu i gysylltu, myfyrio a hel atgofion ar wahanol gyfnodau yn y gorffennol.
Mae James, sydd wedi bod yn mynychu The Sunflower Lounge ers pedair blynedd, yn helpu i ddarparu'r prosiect hwn. Fel person ifanc a oedd wedi gadael gofal, methodd y rhan fwyaf o'i flynyddoedd yn yr ysgol a gadawodd addysg gydag ychydig o sgiliau i'w alluogi i sicrhau cyflogaeth. Dywedodd James:
"Rydw i wedi dysgu cymaint am drefnu digwyddiadau fel hyn. O ymchwilio i'r cyfnod, i greu dogfennau ar-lein a chreu gwahoddiadau gydag offer ar-lein. Rhywbeth na fyddwn i erioed wedi ei gyflawni o'r blaen."
Mae manteision cael gwell cysylltedd hefyd wedi rhoi mwy o gyfleoedd i The Sunflower Lounge hyrwyddo eu gwaith a chodi eu proffil. Mae ganddyn nhw gylchlythyr rheolaidd, cyfrifon cyfryngau cymdeithasol a siop ar-lein, sy'n ei gwneud hi'n haws i fwy o bobl gymryd rhan.
